ཨུ་ཡོན་རིན་ཆེན་རྒྱལ་གྱིས་རྨ་འབྲི་རྫ་གསུམ་འབྱུང་ཡུལ་རྒྱལ་ཁབ་སྤྱི་གླིང་སྒྲིག་གཞི་ཚོད་ལྟ་འཛུགས་སྐྲུན་ཐད་རྒྱབ་སྐྱོར་སྔར་ལས་ཆེན་པོ་བྱེད་རྒྱུའི་གྲོས་གཞི་བཏོན།

ཀྲུང་གོ་བོད་ཀྱི་དྲ་བའི་འཕྲིན། ཉེ་བའི་ལོ་འགའི་རིང་ལ། མཚོ་སྔོན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་ཧ་ཅང་མཐོང་ཆེན་བྱས་ནས། རྨ་འབྲི་རྫ་གསུམ་འབྱུང་ཡུལ་རྒྱལ་ཁབ་སྤྱི་གླིང་སྒྲིག་གཞི་ཚོད་ལྟ་དེ་བཅོས་བསྒྱུར་བཟོ་སྐྲུན་གལ་ཆེན་དུ་བརྩིས་ཏེ། ལོ་གཅིག་ནང་རྨང་གཞིའི་བྱ་བ་ཇེ་བརྟན་དུ་གཏོང་བ་དང་། ལོ་གཉིས་ནང་ཚོད་ལྟའི་ལས་འགན་ཡོངས་འགྲུབ་བྱེད་པ། ལོ་ལྔའི་ནང་རྒྱལ་ཁབ་སྤྱི་གླིང་འཛུགས་སྐྲུན་བྱེད་པའི་བྱ་བའི་དམིགས་འབེན་བཏོན་པ་མ་ཟད། ཕྱོགས་སོ་སོའི་རིགས་སྟོབས་དང་ཞིང་ཆེན་ཡོངས་ཀྱི་སྟོབས་ཤུགས་གཅིག་ཏུ་སྒྲིལ་ནས་ཕན་འབྲས་ལྡན་ཞིང་མགྱོགས་མྱུར་སྒོས་ཚོད་ལྟའི་བྱ་བ་སྤེལ་བས། རྒྱལ་ཁབ་སྤྱི་གླིང་སྒྲིག་གཞི་ཚོད་ལྟའི་འཛུགས་སྐྲུན་ཐད་ཀྱི་འགོ་བཟང་བོ་བརྩམས། དེར་གཞིགས་ནས། མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཀྱི་ཨུ་ཡོན་རིན་ཆེན་རྒྱལ་གྱིས་རྨ་འབྲི་རྫ་གསུམ་འབྱུང་ཡུལ་རྒྱལ་ཁབ་སྤྱི་གླིང་སྒྲིག་གཞི་ཚོད་ལྟའི་འཛུགས་སྐྲུན་ཐད་རྒྱབ་སྐྱོར་སྔར་ལས་ཆེན་པོ་བྱེད་རྒྱུའི་གྲོས་གཞི་བཏོན།

གྲོས་གཞིའི་ནང་བཤད་རྒྱུར། རྨ་འབྲི་རྫ་གསུམ་འབྱུང་ཡུལ་རྒྱལ་ཁབ་སྤྱི་གླིང་སྒྲིག་གཞི་ཚོད་ལྟའི་བྱ་བ་ལག་བསྟར་བྱས་པ་དེས། སྔོན་ཆད་ཀྱི་སྒྲིག་གཞི་རྙིང་དོར་ནས་དོ་དམ་ཐད་ཀྱི་སྒྲིག་གཞི་གསར་བ་བཙུགས་པ་དང་། གནད་ཕིགས་དབུལ་སྐྱོར་ལ་ཟུང་འབྲེལ་བྱས་ནས། སྐྱེ་ཁམས་དོ་སྲུང་གི་རྣམ་པ་གསར་བ་འཚོལ་ཞིབ་བྱས་ལ། སྲུང་སྐྱོབ་ཀྱི་བརྗོད་གཞི་འབུར་དུ་ཐོན་པར་བྱས་ཏེ། ཆ་སྡེབས་ཀྱི་ལམ་ལུགས་གསར་བ་འཐུས་ཚང་དུ་བཏང་བ་དང་། ཕྱོགས་མང་པོས་མ་དངུལ་གྲབས་གསོག་བྱས་ནས། སྒྲིག་གཞི་ཚོད་ལྟའི་ཐད་ཀྱི་མ་དངུལ་གཏོང་ཚད་ཇེ་མང་དུ་བཏང་། ཡིན་ན་ཡང་། རྨ་འབྲི་རྫ་གསུམ་འབྱུང་ཡུལ་རྒྱལ་ཁབ་སྤྱི་གླིང་དེ་མགོ་ལོག་བོད་རིགས་རང་སྐྱོང་ཁུལ་རྨ་སྟོད་རྫོང་དང་། ཡུས་ཧྲུའུ་བོད་རིགས་རང་སྐྱོང་ཁུལ་རྫ་སྟོད་རྫོང་དང་འབྲི་སྟོང་རྫོང་། ཆུ་དམར་ལེབ་རྫོང་བཅས་རྫོང་གསུམ་དང་ཨ་ཆེན་གངས་རྒྱབ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་གྱི་མངའ་ཁོངས་བཅས་དང་འབྲེལ་བ་ཡོད་པ་དང་། སྤྱི་གླིང་གི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ་འབུམ་གཅིག་ཁྲི་གཉིས་སྟོང་གསུམ་དང་བརྒྱ་ཡོད་ལ། རྨ་འབྲི་རྫ་གསུམ་འབྱུང་ཡུལ་གྱི་རྒྱ་ཁྱོན་གྱི་བརྒྱ་ཆའི་སོ་གཅིག་ལྷག་ཟིན་པ་དང་། སྤྱི་གླིང་ནང་དུ་བསྡོམས་པས་ཞང་དང་གྲོང་རྡལ་བཅུ་གཉིས་དང་སྡེ་བ་ང་གསུམ། འབྲོག་ཁྱིམ་ཁྲི་གཅིག་དང་སྟོང་བདུན། མི་ཁྲི་དྲུག་དང་སྟོང་གཉིས་ཡོད་པའི་ཁར། སྤྱི་གླིང་ཁུལ་གྱི་རྒྱ་ཁྱོན་ཆེ་ཞིང་གྲང་ངར་ཆེ་ལ་དབེན་གནས་ཡིན་པའི་རྐྱེན་གྱིས། དུས་ཡུན་རིང་བོར་འགྲིམ་འགྲུལ་དང་འཕྲིན་གཏོང་། ནུས་ཁུངས། གློག་ཤུགས། གད་སྙིགས་དང་བཙོག་ཆུ་ཐག་གཅོད་སོགས་རྨང་གཞིའི་སྒྲིག་ཆས་འཛུགས་སྐྲུན་རྗེས་ལུས་ཡིན་པ་དང་། ཁོར་ཡུག་སྲུང་སྐྱོབ་ནུས་པ་དང་སྤྱི་ཐུན་ཞབས་ཞུའི་སྒྲིག་ཆས་མི་འདང་ལ། ནོར་ཤུགས་ཉམས་ཞན་ཡིན་པ་དང་ལོ་རྒྱུས་ཀྱི་བུ་ལོན་ཆད་པ་མང་པས། སྤྱི་གླིང་ཁུལ་གྱི་རྗེས་མཐུད་འཕེལ་རྒྱས་ཐད་འདེགས་སྐྱོར་བྱེད་རྒྱུ་དཀའ་མོ་ཞིག་རེད་ཟེར།

དེར་བརྟེན། རིན་ཆེན་རྒྱལ་གྱིས་ཀྲུང་དབྱང་གིས་རང་ཞིང་གི་ཚབ་བྱས་ནས་རྨ་འབྲི་རྫ་གསུམ་འབྱུང་ཡུལ་རྒྱལ་ཁབ་སྤྱི་གླིང་གི་རང་བྱུང་ཐོན་ཁུངས་ལ་སྲུང་སྐྱོབ་དང་དོ་དམ་བྱེད་པའི་འགན་འཁྲི་ལག་བསྟར་བྱེད་པའི་སྐབས་སུ། དམིགས་བསལ་གྱི་སྲིད་ཇུས་དང་མ་དངུལ་ཐད་ཀྱི་རྒྱབ་སྐྱོར་སྔར་ལས་མང་པོ་བྱས་ཏེ། སྐྱེ་ཁམས་སྲུང་སྐྱོབ་བྱེད་པའི་ཐད་ཀྱི་རྨང་གཞིའི་སྒྲིག་ཆས་དང་གད་སྙིགས་དང་བཙོག་ཆུ་ཐག་གཅོད་པའི་སྒྲིག་གཞི། གཞུང་ལམ་ལ་སྐོར་ཞིབ་བྱེད་པ། དོ་དམ་ཚད་ལྡན་དང་ལག་རྩལ་ཚད་ལྡན་མ་ལག་འཛུགས་སྐྲུན་བྱེད་པ། རིག་སྟོབས་ཀྱི་རྒྱལ་ཁབ་སྤྱི་གླིང་། དྲིལ་སྒྲོག་སློབ་གསོ་དང་གསོ་སྦྱོང་ཐད་བཀོལ་སྤྱོད་བྱེད་པ་དང་། སྐྱེ་ཁམས་དོ་སྲུང་གི་སྤྱི་ཕན་ལས་རྐང་ཁྲི་གཅིག་སྟོང་བདུན་བཀོད་སྒྲིག་བྱེད་པའི་ཐད་བཀོལ་སྤྱོད་བྱེད་རྒྱུའི་གྲོས་གཞི་བཏོན།   །