རྩྭ་ཐང་ནས་འཚར་ལོངས་བྱུང་བའི་རྒྱལ་ཁབ་རིམ་པའི་ཆེད་མཁས་པ་དབང་ཆེན་ཚེ་བརྟན།

མཚོ་སྔོན་གསར་འགྱུར་དྲ་བའི་འཕྲིན།    མཚོ་བྱང་བོད་རིགས་རང་སྐྱོང་ཁུལ་མདའ་བཞི་རྫོང་དུ་སྐྱེས་པའི་དབང་ཆེན་ཚེ་བརྟན་ནི་རྩྭ་ཐང་ནས་འཚར་ལོངས་བྱུང་པའི་སོག་རིགས་ཕོ་རྒོད་ཅིག་ཡིན།  ཁོའི་ཨ་མེས་ནི་བོད་སྨན་སྨན་པ་ཞིག་ཡིན་པས།   ཆུང་དུས་ནས་ཨ་མེས་དང་མཉམ་དུ་རི་འགོ་ནས་སྨན་རྩྭ་འཐུ་བ་དང་། ཕྱིར་ཡུལ་ལ་ལོག་རྗེས་སྨན་རྩྭ་བསྐམས་ཞིང་བརྡུངས་པས་རིམ་གྱིས་བོད་སྨན་སྡེབ་སྦྱོར་གྱི་གོ་རིམ་མ་ལུས་པ་ངེས་པར་གྱུར།

སྟེས་དབང་གི་གོ་སྐབས་ཤིག་དང་འཕྲད་དེ། དབང་ཆེན་ཚེ་བརྟན་མཚོ་སྔོན་ཞིང་ཆེན་འཕྲོད་བསྟེན་སློབ་གྲྭས་ཚབ་སྒྲུབ་བྱས་པའི་རྨ་ལྷོ་བོད་རིགས་རང་སྐྱོང་ཁུལ་འཕྲོད་བསྟེན་སློབ་གྲྭའི་ཞིང་ཆེན་ཡོངས་ཀྱི་སྐབས་གཉིས་པའི་བོད་སྨན་འཛིན་གྲྭར་རྒྱུགས་འཕྲོད། སློབ་གྲྭ་དེ་ནས་ཁོས་བོད་ཀྱི་གསོ་བ་རིག་པ་ཆ་ཚང་དུ་སློབ་སྦྱོང་བྱེད་མགོ་བརྩམས་པ་རེད།

ཆུང་དུས་ནས་སོག་སྐད་ལས་བཤད་མི་ཤེས་པའི་དབང་ཆེན་ཚེ་བརྟན་ལ་མཚོན་ན།  སློབ་ཁྲིད་སྐབས་སུ་བོད་ཡིག་དང་བོད་སྐད་ཁོ་ན་མ་གཏོགས་བཀོལ་སྤྱོད་མི་བྱེད་པས་ཁོས་དཀའ་ཁག་ཆེན་པོ་མྱངས།འོན་ཀྱང་ཁོས་རྒྱུན་འཁྱོངས་ལྷོད་མེད་ཀྱི་འབད་བརྩོན་ལ་བརྟེན་ནས་སློབ་གྲོགས་ཚོ་དང་མཉམ་དུ་བོད་སྐད་སྦྱངས་པ་དང་། དུས་ཚོད་ཡོད་དུས་བོད་ཡིག་རང་སྦྱོང་བྱས། དེ་ལྟར་བརྩོན་པ་བསྐྱེད་རུང་ད་རུང་སློབ་སྦྱོང་གི་རྗེས་མ་ཆོད། ཉིན་ཞིག་སློབ་གྲྭའི་སློབ་གཙོ་ཁོ་བཙལ་ནས་ཁ་ཏ་བྱས་ཏེ་བོད་སྨན་ཆེད་ལས་དོར་ན་ལེགས་པའི་རེ་བ་བཏོན། ཁོས་ཀྱང་མིག་མདུན་གྱི་དཀའ་ཁག་ལ་གཞིགས་ནས་བོད་ལུགས་གསོ་རིག་ཆེད་ལས་དོར་ཏེ། ཕྱིར་ཕ་ཡུལ་ལ་ལོག་རྗེས་ཡང་བསྐྱར་ཆེད་ལས་ཤིག་སྦྱང་འདོད་པའི་བསམ་པ་སྐྱེས། འོན་ཀྱང་། བསམ་བློ་དེ་སྐད་ཅིག་དེ་ཉིད་དུ་མེད་པར་གྱུར་ཏེ། ཁོས་སློབ་གཙོ་ལ་གལ་ཏེ་ལོ་མཇུག་ལ་སློབ་མཇུག་གི་རྒྱུགས་མ་འཕྲོད་ཚེ་ཁོ་རང་ཉལ་ཆས་འཁུར་ནས་ཕ་ཡུལ་ལ་ལོག་རྒྱུ་ཡིན་པའི་དམ་བཅའ་བཞག་པ་རེད།

ཁོའི་དཀའ་ཁག་སུས་ཀྱང་མི་ཤེས་པའི་ལོ་ཟླའི་ནང་དུ། དབང་ཆེན་ཚེ་བརྟན་གྱིས་ཉིན་མཚན་བལྟོས་མེད་ཀྱིས་བོད་ཡིག་སློབ་སྦྱོང་བྱས་པ་དང་། མུ་མཐུད་དུ་བོད་ཀྱི་གསོ་བ་རིག་པའི་རྨང་གཞིའི་ཤེས་བྱ་བློར་བཟུང་། གཉིད་ཁོམ་མེད་ལ་ཐང་ཆད་ཀྱང་ངལ་གསོ་ཁོམ་མེད་པར་བཟོད་བསྲན་བྱེད་ཐུབ་རག་བར་དུ་བརྩོན་པ་བྱས་པས།  མཐའ་མར། ལོ་འཁོར་གྱི་མཇུག་རྒྱུགས་དེ་འཛིན་གྲྭའི་ནང་གི་སྔོན་གྲས་སུ་ཚུད་པའི་འབྲས་བུ་ལེགས་པོ་ལོན།

འབྲིང་རིམ་ཆེད་སྦྱོང་ལས་མཐར་ཕྱིན་རྗེས། དབང་ཆེན་བརྟན་གྱིས་རང་འགུལ་གྱིས་ཕ་ཡུལ་དུ་བྱ་བ་བསྒྲུབ་འདོད་ཀྱི་རེ་བ་བཏོན་པ་ལྟར། མཚོ་བྱང་ཁུལ་མདའ་བཞི་རྫོང་ཝ་འཇོག་ཞང་འཕྲོད་བསྟེན་ཁང་དུ་ལས་བགོས་བྱས་པ་དང་།  ས་ཆ་དེ་ནས་ཁོས་ཡུལ་དེའི་བོད་སྨན་སྐབས་བསྟེན་ཁང་ཐོག་མ་བཙུགས་ཤིང་།  དཀའ་སྡུག་ཆེ་བའི་སྨན་བཅོས་ཆ་རྐྱེན་ལ་དམིགས་ནས་ཁོ་དང་ཁོའི་ལས་གྲོགས་ཚོས་བྱེད་ཐབས་སྣ་ཚོགས་སྤྱད་ནས་དཀའ་སྡུག་མ་ལུས་ཁྱད་དུ་བསལ་བ་དང་།  ཐེངས་མང་པོར་བོད་ལྗོངས་སོགས་ཀྱི་ས་ཆར་སོང་སྟེ་སྨན་རྩྭ་ཉོ་བ་སོགས་ཁོ་གཅིག་པུས་སྨན་པ་དང་སྨན་གཡོག  སྨན་གཉེར་བཀའ་བཅུ་པ་བཅས་ཀྱི་ལས་ཀ་གཉེར་དགོས་སོང་།  

དུས་ཚོད་ནི་བྲེལ་འཚུབ་ཀྱི་ཁྲོད་དུ་དལ་གྱིས་ཟད་སོང་། ནན་མོས་སློབ་སྦྱོང་དང་ལས་ཀ་ཧུར་ཐག་བྱས་ནས། དབང་ཆེན་ཚེ་བརྟན་གྱི་སྨན་བཅོས་ལག་རྩལ་ཉིན་རེ་བཞིན་འཕེལ་རྒྱས་གོང་འཕེལ་བྱུང་།  རོང་འབྲོག་མང་ཚོགས་ཀྱི་ཁྲོད་དུ་ཁོའི་སྙན་གྲགས་ཅུང་རྒྱས་པ་སྟེ།  ཉིན་རེར་ཐག་རིང་གི་རྐང་ཚ་དང་མདོ་ལ་སོགས་ཀྱི་ས་གནས་སུ་ཁོ་ལ་ནད་སྟོན་དུ་ཡོང་པའི་ནད་པའི་མི་གྲངས་བརྒྱ་ཕྲག་ལ་སླེབས་སོང་།

འབྲོག་པ་མང་ཚོགས་ལ་དེ་བས་ལེགས་པའི་ཞབས་ཞུ་བཟང་པོར་བསྒྲུབ་ཆེད། དབང་ཆེན་ཚེ་བརྟན་འབྲོག་པ་ཚོའི་རྗེས་སུ་དེད་ནས་དབྱར་སྟོན་གཉིས་ཀྱི་རྩྭ་ས་ལའང་རྒྱུན་དུ་ཐོན་པ་དང་། ཡང་ན་ལེ་དབར་བརྒྱའི་ཕྱི་རོལ་དུ་སྐོར་སྐྱོད་སྨན་བཅོས་བྱེད་དུ་སོང་། སློབ་གྲྭ་ནས་བསླབ་པའི་རིགས་པའི་གཞུང་ལུགས་ཀྱི་ཤེས་བྱ་ལག་ལེན་དང་ཟུང་འབྲེལ་བྱས་ཏེ། ཁོང་གི་སྨན་བཅོས་ལག་རྩལ་སྔར་བྱུང་མ་མྱོང་མེད་པའི་ཡར་ཐོན་ཆེན་པོ་བྱུང་། དེ་དང་མཉམ་དུ་ནད་ཐོག་སྨན་བཅོས་ཀྱི་ཉམས་མྱོང་ཕུན་སུམ་ཚོགས་པ་བསགས།

1997ལོར་མཚོ་སྔོན་ཞིང་ཆེན་བོད་སྨན་ཁང་གི་འཕེལ་རྒྱས་དགོས་མཁོ་ལྟར། དབང་ཆེན་ཚེ་བརྟན་མཚོ་སྔོན་ཞིང་ཆེན་བོད་སྨན་ཁང་གི་སྨན་ལུམས་ཚན་ཁག་ཏུ་ལས་གནས་སྤར་ཏེ།  བྱ་བ་བསྒྲུབས་པ་ཧ་ཅང་བཟང་པས་ལོ་གཉིས་ཀྱི་རྗེས་སུ་སྨན་ཁང་གིས་དམིགས་བསལ་གྱིས་སྨན་བཅོས་ལས་དོན་ཚན་ཁག་ཏུ་བཀོད་སྒྲིག་བྱས་པ་མ་ཟད། ད་དུང་ཀྲུའུ་རེན་གྱི་འགན་འཁུར་དུ་བཅུག་པ་རེད།

མཚོ་སྔོན་ཞིང་ཆེན་བོད་སྨན་ཁང་དུ་ལས་གནས་སྤར་བ་ནས་བཟུང་།   སྨན་ཁང་གི་མགོ་ཁྲིད་དང་ལས་གྲོགས་ཚོས་སེམས་ཁུར་དང་རྒྱབ་སྐྱོར་བྱས་པའི་འོག་ཏུ།  དབང་ཆེན་ཚེ་བརྟན་གྱིས་གཞུང་ལུགས་ཤེས་བྱ་དང་ལས་སྒོའི་ཆུ་ཚད་ཟམ་མི་ཆད་པར་ཇེ་མཐོར་སོང་།  སྨན་ཁང་ནས་ནད་པར་བལྟ་བ་དང་སྨན་བཅོས་བྱེད་པ་ལས་གཞན། ད་དུང་སྔ་གཞུག་ཏུ་པེ་ཅིན་དང་ཧྲིན་ཀྲིན། ཀོང་ཀྲོའུ་སོགས་གྲོང་ཁྱེར་ཉི་ཤུ་ལྷག་ཏུ་ཕྱིན་ནས་བོད་སྨན་ཕྱོགས་ཀྱི་འདྲི་རྟོག་དང་འོས་འགན་ནད་བརྟག་བྱ་འགུལ་རྒྱ་ཆེར་སྤེལ་ནས།  ནད་པ་མི་ཐེངས་ཁྲི་ཕྲག་མང་པོར་བལྟས་ཤིང་སྨན་བཅོས་བྱས་པའི་ཁར།བོད་ལུགས་གསོ་རིག་དང་བོད་སྨན་ཤེས་བྱ་རྒྱ་ཆེར་དྲིལ་སྒྲོག་དང་དར་སྤེལ་བྱས། 2003ལོར།  ཁོ་རང་ཡོན་ཀྲང་གཞོན་པར་གོ་གནས་འཕར་རུང་། འོན་ཀྱང་ཁོས་རང་གི་ལག་གི་ལས་ཀ་ནམ་ཡང་དོར་མ་མྱོང་།

2004ལོར་དབང་ཆེན་ཚེ་བརྟན་གྱིས་སྣེ་ཁྲིད་དེ་མཚོ་སྔོན་ཞིང་ཆེན་བོད་སྨན་ཁང་གི་རྒྱལ་ཁབ་སྨན་རྫས་ཀྱི་ནད་ཐོག་ཚོད་ལྟའི་ལས་ཁུངས་འཛུགས་པའི་རེ་ཞུ་ལེགས་འགྲུབ་བྱུང་།  རྒྱལ་ནང་དུ་ཉམས་མྱོང་དང་དཔེ་ལྟ་ས་ཅི་ཡང་མེད་པའི་གནས་ཚུལ་འོག་ཏུ།   ཁོས་སྨན་གསར་དང་ནད་ཐོག་སྨན་བཅོས་ཞིབ་འཇུག་ཐད་ཀྱི་འབྲེལ་ཡོད་ཤེས་བྱ་ཧུར་ཐག་སྒོས་ཞིབ་འཇུག་བྱས་པ་དང་།  རྒྱལ་ཁབ་ཀྱིས་སྤེལ་བའི་སྨན་རྫས་ནད་ཐོག་གི་ཚོད་ལྟའི་སྤུས་མཚག་དོ་དམ་ཚད་ལྡན་གྱི་ཤེས་བྱ་གསོ་སྐྱོང་ཁྲོད་ཐེངས་མང་པོར་ཞུགས་པ།  སྨན་ཁང་ཡོངས་ཀྱི་སྨན་པ་དང་ནད་གཡོག་རྣམས་ཀྱིས་ནད་ཐོག་གི་སྨན་རྫས་གསར་པའི་ཞིབ་འཇུག་ཕྱོགས་ཀྱི་ཤེས་བྱ་སློབ་པར་དངོས་སུ་མཛུབ་སྟོན་དང་ཟུར་ཁྲིད་བྱས་ཏེ།   བོད་སྨན་གྱི་ཁྱད་ཆོས་དང་སྦྲེལ་ནས་ཡིག་འབྲུ་ཁྲི་བརྒྱ་ཕྲག་ལོན་པའི་ཆེད་ལས་སོ་སོའི་ཚད་གཞི་བེད་སྤྱོད་ཀྱི་སྒྲིག་སྲོལ་དང་བྱ་བའི་ལམ་ལུགས་གཏན་འབེབས་བྱས། དེར་མ་ཟད་གཙོ་གཉེར་དོ་དམ་སྡེ་ཁག་ནས་ཞུ་དག་དང་པོ་དང་བསྐྱར་ཞིབ་ཐོབ་ནས།  2004ལོའི་ཟླ10པར་བདེ་བླག་ངང་རྒྱལ་ཁབ་ཀྱི་ཟས་རིགས་དང་་ཛསྨན་རྫས་ལྟ་སྐུལ་དོ་དམ་ཅུས་ཀྱིས་ཞིབ་བཤེར་རྩིས་ལེན་ཐོབ་སྟེ།  རྒྱལ་ཁབ་ཀྱི་བོད་སྨན་སྨན་རྫས་ནད་ཐོག་ཚོད་ལྟའི་ལས་ཁུངས་ཐོག་མར་གྱུར་པ་དང་། མཚོ་སྔོན་ཞིང་ཆེན་ན་རྒྱལ་ཁབ་སྨན་རྫས་ནད་ཐོག་ཚོད་ལྟ་ལས་ཁུངས་མེད་པའི་སྟོང་ཆ་བསྐངས་པ་དང་།  ཕྱིན་ཆད་རྒྱལ་ཡོངས་ཀྱི་བོད་སྨན་སྨན་རྫས་གསར་བ་ཚད་ལྡན་ཅན་དུ་ནད་ཐོག་ཏུ་ཞིབ་འཇུག་བྱེད་པ་ལའང་རྨང་གཞི་བརྟན་པོ་བཏིངས་པ་རེད།།    

ལོ་ཙཱ་བ། གཡང་སྐྱིད།